गडचिरोली : ‘आदिवासी विकास विभागांतर्गत दर वर्षी राज्यस्तरीय क्रीडा स्पर्धेचे आयोजन करण्यात येते. विद्यार्थ्यांना क्रीडा क्षेत्रात राज्यस्तरीय व्यासपीठ उपलब्ध करून देणे हा यामागील शासनाचा मुख्य हेतू आहे. आदिवासी विद्यार्थ्यांमध्ये शारीरिक काटकपणा, धैर्य, चिकाटी हे क्रीडापूरक गुण उपजतच असतात. मागील वर्षी आपल्या जिल्ह्यात विभागीय क्रीडा संमेलन झाले. आता राज्यस्तरीय क्रीडा स्पर्धा होत आहेत. विभागातील सर्व आदिवासी खेळाडूंनी आपल्यातील क्रीडा गुणांचे उत्कृष्ट सादरीकरण करावे व विभागाचे नाव गौरवान्वित करावे,’ असे प्रतिपादन जिल्हा परिषद अध्यक्ष येागिता भांडेकर यांनी केले.
आदिवासी विकास विभाग नाशिक अंतर्गत शासकीय व अनुदानित आश्रमशाळेतील विद्यार्थ्यांच्या राज्यस्तरीय क्रीडा संमलनाचे आयोजन गडचिरोली येथील जिल्हा प्रेक्षागार मैदानावर केले होते. या कार्यक्रमाचे उद्घाटन २९ जानेवारी २०१९ ला जिल्हा परिषद अध्यक्ष भांडेकर यांचे हस्ते झाले. त्यावेळी त्या बोलत होत्या.
आदिवासी आयुक्त डॉ. किरण कुळकर्णी हे कार्यक्रमाच्या अध्यक्षस्थानी होते. प्रमुख पाहुणे म्हणून नागपूरचे अप्पर आयुक्त ऋषिकेश मोडक, अमरावतीचे अप्पर आयुक्त प्रदीप चंद्रन, जिल्हाधिकारी शेखर सिंह, उपआयुक्त केशव बावनकर, सहाय्यक जिल्हाधिकारी डॉ. सचिन ओंबासे, इंदुराणी जाखड, नगराध्यक्ष योगिता पिपरे, अतिरिक्त पोलिस अधीक्षक गर्ग, भंडाराचे सहाय्यक जिल्हाधिकारी कृष्णा पांचाळ, चंद्रपूरचे सहाय्यक जिल्हाधिकारी योगेश कुम्बेटकर, कृषी सभापती नाना नाकाडे आदी मान्यवर उपस्थित होते.
या तीन दिवसीय क्रीडा संमलनात ठाणे, नाशिक, अमरावती आणि नागपूर विभागांतील दोन हजार विद्यार्थी सहभागी झाले आहेत. यामध्ये १४, १७ व १९ वयोगटांतील मुला- मुलींचे कबड्डी, खो-खो, व्हालीबॉल आदी सांघिक खेळांसह विविध वैयक्तिक खेळांचे आयोजन केले आहे.
उद्घाटन सोहळ्याप्रसंगी प्रकल्पातील खेळाडूंनी सादर केलेल्या झांकी प्रमुख आकर्षण ठरल्या. या झांकीतून समाजाला दिशा देणारे संदेश देण्यात आले. या वेळी गडचिरोली प्रकल्पातील रेला नृत्य विशेष आकर्षण ठरले होते. तसेच येथे भंगडा नृत्य सादर करण्यात आले.
जिल्हाधिकारी शेखर सिंह यांनी सर्व खेळाडू विद्यार्थ्यांना शुभेच्छा देऊन कार्यक्रमाच्या नियोजनाबाबत समाधान व्यक्त केले. गडचिरोलीसारख्या दुर्गम व आदिवासीबहुल जिल्ह्यात २०१८-१९मध्ये पहिल्यांदाच राज्यस्तरीय स्पर्धा आयोजित केल्या आहेत. यामुळे राज्यातील विविध भागांतून आलेल्या विद्यार्थी, कर्मचारी तसेच क्रीडाप्रेमींना येथील संस्कृती, क्रीडा कौशल्य, समाजजीवन या विषयी माहिती मिळणार आहे.
नागपूरचे अप्पर आयुक्त मोडक यांनी प्रास्ताविक केले. अनिल सोमनकर यांनी सूत्रसंचालन केले. डॉ. ओंबासे यांनी आभार मानले.